Një nga mundësite e komunikimit tonë me të padukshmen është RADIESTEZIA. Forma më e lashtë e radiestezisë është zbulimi (nga njerëz të caktuar) i ujit përmes thuprave drunjësh të caktuar.
Sot nocioni radiestezi nënkupton zbulimin dhe identifikimin e rrezatimeve të dëmshme, të pakapshme për perceptimet e zakonshme të njeriut. Burimet e tyre mund të jenë të ndryshme: rrjedhat e ujit – mbitokësore, por sidomos nëntokësore, puset e mineraleve, energjitë radioaktive, kënetat e dikurshme, varret, largpërçuesit e rrymës elektrike, instalimet elektrike, instalimet nukleare etj.
Radiestezia ndihmon për t’u mbrojtur prej këtyre rrezatimeve të dëmshme, të cilat ndikimin e tyre e shtrijnë në të gjitha segmentet e jetës, në nivele psiqike dhe fizike, duke filluar nga shëndeti, vitaliteti i përgjithshëm, disponimi, lumturia dhe fati. Grindjet, pagjumësia, kokëdhembjet, lodhja mund të jenë pasoja tipike të zonës patogjene në të cilën flemë apo kalojmë pjesën më të madhe të ditës në shtëpi, punë etj. Rrezatime të tilla depërtojnë nëpër të gjithë trupin, duke atakuar sistemin nervor, sidomos sistemin nervor qendror.
Truri reagon në tërë këtë oqean rrezatimesh dhe reaksionet e veta ia transmeton tërë trupit duke krijuar nje numër aq të madh sëmundjesh bashkëkohore. Ka raste kur një ndërrim i thjeshtë i vendit të krevatit në të cilin flemë apo vendit të punës – mund ta ndërroj jetën tonë.